ما هي التجارة الالكترونية؟
التجارة الإلكترونية هي عملية مهمة مقصود بيها شراء أو بيع منتجات أو خدمات عن طريق الإنترنت، والنوع ده من التجارة بقى رائج ومنتشر جداً الفترة الأخيرة، وأنا هنا بتكلم عن منطقتنا -منطقة الشرق الأوسط والوطن العربي- وبنلاحظ تصدر 3 دول عربية في مؤشر المدفوعات طبقاً لتقرير شركة “Payfort بيفورت” والدول دي هي مصر والسعودية والإمارات، وده بيدينا معلومة مهمة أوي، وهي ان الناس بدأت تاخد بالها ان الإنترنت مساحة آمنة جداً انهم يشتروا منها، خصوصاً وإن الطريقة التقليدية في التسوق إنهم لما بيشتروا حاجة مباشرة بيرجعوا بيها بيتهم، وهنا البيئة الآمنة دي لغت الخوف من نقطة الدفع، لأنه لما بيدفع بعد مدة معينة المشتري بيستلم المنتج بتاعه.
لو جينا نتكلم عن نسبة التعامل مع التجارة الإلكترونية في مصر مثلاً تحديداً سنة 2016 هنلاقي ان نسبة الشراء ارتفعت في سنة واحدة بس لـ نسبة 16% عن السنة اللي قبلها 2015-2016 .. وده إن دل على شيء فدلالته هاتكون ان كل ما الوقت بيعدي كل ما بتقدر التجاره الالكترونيه تكسب ثقة زبائنها بشكل يدعو فعلاً للإنبهار والتأمل.
لكن مع ذلك تظل النسبة قليلة، وده علشان فيه فئة أكبر لسة مش واثقة في طرق الدفع الأونلاين، وده أدّي لوجود طرق دفع مختلفة خلقت ثقة أكبر وقللت الفجوة بين الشراء اونلاين والمستهلكين الباقيين من الفئات التانية، زي مثلاً طريقة الدفع عند الإستلام، اللي بيفضلها أكتر من 70% من مستخدمين الشراء عن طريق الإنترنت والمتاجر الإلكترونية.
أنواع التجارة الإلكترونية:
1) B2B
وB2B معناها Business to Businessوالنوع ده من التجاره الإلكترونيه بيعتمد على بيع المنتجات لصالح شركة تانية، كواحدة من أهم التعاملات من شركة لشركة تانية أو عدة شركات، المهم ان البيزنس بيتم في النطاق ده.
2) B2C
و B2C اختصار لـ Business to Customer والنوع ده من التجارة الالكترونية بيعتمد على بيع المنتجات أو الخدمات لصالح المستهلك، وده من أكتر أنواع البيزنس انتشاراً، ومثال عالنوع دة من التجارة الإلكترونية بنقابل متاجر إلكترونية كتيرة وشهيرة زي أمازون ونون وجوميا وعلي بابا .. وطبعاً حبيبتكم بيست بوست.
3) C2B
و C2B اختصار لـ Customer to Business والنوع ده من التجاره الإلكترونيه بنشوفه في مواقع الفريلانس اللي بتقدم خدمات لأصحاب الشركات والنشاطات المختلفة لما بيقوم أفراد بتلبية متطلبات الشركات اللي بتطلبها زي خدمات الجرافيك ديزاين وتصميم الشعار، وكمان تصميم المواقع الإلكترونية المختلفة.
4) C2C
و C2C اختصار لـ Customer to Customer والنوع ده من التجارة الإلكترونية عبارة عن خدمة بيع المنتجات من عميل إلى آخر، وعادةً المنتجات دي بتكون مستعملة، زي مثلاً السوق المفتوح وأوليكس اللي بقوا من أكتر المواقع رواجاً الفترة الأخيرة.
أهمية التجارة الإلكترونية
الأكيد ان التجارة الإلكترونية ليها أهمية كبيرة أوي، وهنلاحظ ده في النقاط اللي هنذكرها دلوقتي عن أهمية التجارة الإلكترونية، والنقاط دي بتتلخص في الآتي:
– التجاره الإلكترونيه هتساعدك تتميز عن منافسيك.
– التجارة الالكترونية هتساعدك على صول لعملاء أكتر في كل مناطق العالم.
– التجارة الإلكترونية كمان هتساعدك تخفّض التكاليف عن طريق البيع المباشر للعملاء وهتقلل من عدد المتاجر التقليدية.
– تجارة الكترونية يعني تمكين العملاء من الشراء في أي وقت وفي أي مكان.
– التجاره الالكترونيه هتساعدك تعرف العملاء وتتعرف على بياناتهم القيمة، من خلال التحليلات اللي هاتقدر منها تتعرف على اهتمامات عميلك عبر الإنترنت، وهتساهم بشكل كبير على تقديم الأفضل دايماً ليهم.
– التجارة الإلكترونية بتوفرلك اختبار المنتجات والخدمات والعلامات التجارية والشركات الجديدة في السوق بأقل استثمار المسبق، عكس المتاجر التقليدية اللي بتحتاج استثمار كبير و “يا صابت يا خابت”.
– التجارة الإلكترونية بتساهم بشكل أساسي في التوسع بشكل أسرع وبتكلفة منخفضة أكتر.
بعض النقاط المهمة أوي اللي لازم تاخد بالك منها لو قررت تدخل عالم التجارة الإلكترونية
وهنا هنتكلم عن نقاط كتيرة لازم تاخد بالك منها وانت بتبتدي متجرك الإلكتروني لأنها هتساهم بشكل كبير في انشاءك للمتجر الالكتروني بشكل صحيح وهتساعدك تحقق الإنتشار اللي عايز توصلّه في وقت أقل، لأن ببساطة كل ما كانت الخطوات سليمة وصحيحة من البداية كل ما ده وفّر عناء تصليح حاجات كتير بعد كده ما بدأتش بشكل سليم..
1) المحتوى
لازم يكون المحتوى بتاعك على درجة كبيرة جداً من الجودة علشان تحقق أكبر عائد ربحي، ولازم تخطط انك تكون جزء من منصات السوشيال ميديا صاحبة النصيب الأكبر من اهتمام العملاء اللي بتدوّر عليهم، وأغلب الظن انك هتلاقيهم هناك 24/7 -ايموجي بيضحك- ، كمان لازم تجهز محتوى لرسائل البريد الإلكتروني، وكمان لازم يكون عندك مدونة، واللي من خلالها هتقدر تكتب عن منتجاتك وتشارك عميلك بآخر اخبار البراند بتاعك، وتخلق مجتمع يقدر فيه عميلك “ياخد ويدّي معاك” بكل أريحية، ويعبر عن رأيه فيك وفي منتجك.
ولحسن الحظ اننا هنا في بيست بوست بنقدم خدمة كتابة محتوى صفحات المتاجر الإلكترونية والمواقع كمان، وصف مفصل وعبقري لكل المنتجات الخاصة بيك، فـ ما تترددش أبداً انك تتواصل معانا “احنا أهل” ..
2) طرق الدفع
الحقيقة ان النقطة دي مهمة جداً لكتير من الناس اللي بتشتري اونلاين، فلازم يكون عندك طرق دفعة مختلفة ومرنة زي خدمة الدفع عند الإستلام وخدمة التقسيط وغيره من التسهيلات اللي تخليك تجمع أكبر عدد من العملاء وتحل كتير من العقبات اللي ممكن تتسبب في ان سلة مشتريات عملاءك تفضل مهجورة.
3) برامج النقاط
برامج النقاط من أبرز حلول مشكلة خمول العملاء القدامى، وهنا الحل ده هيخلي كتير من عملائك اللي كانوا موجودين وبطلوا يشتروا منك لأي سبب، انهم يرجعوا من جديد علشان يحصلوا على مميزات برامج النقاط، اللي هيقدروا من خلالها انهم يستبدلوا النقاط دي بمنتجات حسب رغبتهم من المتجر الالكتروني بتاعك.
وصدقني لو طبقت البرنامج ده هتحقق مكاسب كتيرة فوق ما تتوقع، لأنك هتشجع عملية الشراء اللي هاتبقى بطريقة كثيفة عن قبل كده، وهتحققلك التارجت اللي بتطمح انك توصلّه وهتساعدك على ده أوي، علشان كده ما تترددش انك تطبق برنامج النقاط ده.
4) المتجر الإلكتروني
المتجر الإلكتروني أكيد لية مميزات لازم نتكلم عنها وفي نفس الوقت زي أي حاجة في الدنيا لازم بيبقى لها سلبيات، وهنا هكلمك عن 3 سلبيات بيقابلهم 3 مميزات عبقرية يلا بينا؛
– المرونة في الوقت
وواضح جداً من التسمية انها بتتكلم عن مواعيد فتح وغلق المتاجر التقليدية واللي بتحجمك وبتحجم مبيعاتك أوي، بس الموضوع مع المتجر الالكتروني مختلف تماماً وده علشان هاتقدر تكون مع عملائك طول اليوم وطول الوقت وده هيحققلك المبيعات اللي بتحلم بيها، علشان كدة بنسمي التجارة الإلكترونية “العالم الذي لا ينام” يعني حتى وانت نايم فمبيعاتك شغالة وبتتحقق أرباح.
– السلطة والتحكم التام
وده معناه انك هاتكون المتحكم الأول والوحيد في المتجر الإلكتروني الخاص بيك، سواء في اختيار شكل المتجر أو مكان وتصنيف المنتجات الموجودة جوا المتجر، من غير ما تكون محتاج تدفع عمولة لأي حد تاني.
وأحب أوي أفكرك اننا هنا في بيست بوست بنقدم باقة من أفضل مصممي ومطوري المواقع والمتاجر الإلكترونية ما تتردش تتواصل معانا.
– التكاليف
انت كونك صاحب متجر إلكتروني مش هتبقى محتاج تدفع “ايجارات، كهرباء، مياة …” وبصراحة ده هيوفر تكاليف كتيرة أوي معاك، كل اللي هتحتاج انك تدفعه هو تكلفة الدومين والسيرفر اللي هتحجزه علشان ترفع متجرك على الإنترنت ويقدر عملاءك يدخلوا المتجر بسلاسة، والحقيقة ان تكاليف اختيار دومين واطلاق المتجر الكترونياً أقل بكتير عن المتجر التقليدي.
وبالنسبة لكل ما يخص الاستضافات وحجز الدومين فإحنا هنا علشان نساعدك فيها فأوعى أبداً تشيل همها، فـ ما تتردش تتواصل معانا..
أما عن الـ 3 سلبيات اللي ممكن تقابلها وانت بتدخل عالم التجارة الإلكترونية فـ هُما؛
– المستودع
والمستودع أهميته بتكمن في انه بيتحط فيه كل المنتجات الخاصة بيك، مخزن بمساحة كبيرة بتستغله في انك تحفظ فيه منتجاتك لحد ما عميل يطلبه من خلال متجرك الالكتروني ، والمشكلة بتكمن في ان سعر تأجير مخزن عالي شوية، وهنا الحل بيكون انك تتعامل مع متاجر تانية تقدر وتاخد نسبتك على كل عملية بيع تتم من متجرك الإلكتروني.
– المنافسة
زي ما قولتلك قبل كده فـ التجارة الإلكترونية و المتاجر الالكترونية بقت منتشرة بصورة كبيرة مؤخراً، وده بيخلق نوع من أنواع المنافسة اللي بتبقى عالية، هنا بييجي دورك انك تقدر تكسب وتجذب أكبر عدد من العملاء بطرق تسويقية مختلفة، زي العروض مثلاً وبرامج النقاط ..
ولو لسة محتار فإحنا هنا في بيست بوست هنساعدك في خلق استراتيجيات تسويقية جديدة تساعدك تنافس بقوة باقي المتاجر الإلكترونية، تقدر تتصفح مقالاتنا عن التجارة الإلكترونية و التسويق الإلكتروني أو تقدر تتواصل معانا وهنجاوبك على أي استفسار بكل حل ورحابة صدر.
– التسليم
المرحلة دي بالنسبة لكتير من أصحاب المتاجر الإلكترونية عبارة عن بُع بُع بيواجهوه، خصوصاً إنهم لازم يكون عندهم قاعدة لوجيستية متينة، تساعدهم في الوفاء بالمواعيد بتاعت استلام العملاء لمنتجاتهم، والصدق في المواعيد اللي تم اعطاءها للعميل ده بيخلق ثقة كبيرة بين الطرفين البائع والمشتري متينة جداً.
في النهاية أنا عايزة أقولك ان التجارة الإلكترونية مهمة، ومهم أكتر انك تعرف تتعامل معاها بإستراتيجيات تخفف من حدة العوائق والمشكلات اللي ممكن تقابلها وتبقى على أتم الإستعداد ليها، وكمان وقت ما تحصل تبقى واثق انك هتقدر تتخطاها وتعديها، وده اللي احنا بنسعى له هنا في بيست بوست BestPost عن طريق مساعدة كل عملائنا الشغوفين بمجال التجاره الالكترونيه ، وبنساعدهم يعرفوا ازاي يدخلوا مجال التجارة الالكترونية خطوة بخطوة ، وكمان على استعداد لتصميم جميع المدونات والمواقع و المتاجر الالكترونية.
“احنا هنا أهل” ومعاك خطوة بخطوة لحد ما توصل للي عايز تحققه، فـ ما تترددش تتواصل معانا ان كان عندك أي استفسار أو طلب بخصوص التجارة الألكترونية، المتاجر الإلكترونية هانكون هنا ونرد على كل استفساراتك بكل حب ورحابة صدر ..
