الفرق بين الفرخ السليم والفرخ الجاير في مطبعة بيست بوست؟
الطباعة الاوفست في مطبعة بيست بوست بتعتمد علي طريقتين في التعامل مع الورق المطبوع، أول طريقة هي الطباعة علي (رول) زي طباعة الجرايد، والطباعة علي (أفرُخ) ودي الطريقة اللي هنتكلم عنها النهاردة ..
في عالم الطباعة والدعاية والاعلان مشهور مقاسين من الأفرُخ وهُمّا الفرخ السليم والفرخ الجاير، وبنلاقي ان فيه ماكينات بتعتمد على مقاس الفرخ السليم وماكينات تانية بتعتمد على الفرخ الجاير وبنلاقي ان الفرق بيكون بس في المقاس.
الفرق بين الفرخ السليم والفرخ الجاير في مطبعة بيست بوست؟
الفرخ السليم بيكون مقاسه 100×70 سم ، أما الفرخ الجاير فبنلاقي ان مقاسه بيكون 88×66 سم، والمقاسات دي بتعتبر المقاسات الاستاندر للطباعة واعمال الدعاية والاعلان ، مع امكانية تقسيم أو تقطيع المقاسات دي لمقاسات اصغر، علشان تناسب مختلف مقاسات المطبوعات المطلوبة، وعند تقسيمها أو تقطيع الورق نقدر نقسمها لأي مقاس عايزينه، ولكن التقطيع بيكونله استراتيجية كده بتحميك من الهادر، والهادر ده هو أجزاء الورق الباقية من عملية الطباعة والقص وهنا كل ما كان فيه هادر انت بتحط على نفسك تكلفة انت في غنى عنها، فبتضطر انك يا تىشيلها انت يا تشيلها للعميل، وفي الحالتين انت اللي بتخسر..
والاستراتيجية اللي هتحميك من الهادر وتخليك كمان تستخدم المساحات اللي اتبقت في حاجة تانية هي كالآتي؛ فيه تقسيمات مختلفة أدت لوجود تقسيمات، التقسيمات دي متعددة جداً وبتختلف من الفرخ السليم عن الفرخ الجاير، هنعرفها دلوقتي سوا..
لية فيه فرخ سليم وفرخ جاير في مطبعة بيست بوست؟
علشان فيه ماكينات ظبطتها على الورق السليم بمقاسه 100×70 سم ، وفيه ماكينات ظبطة مقاساتها على الورق الجاير بمقاسه 88×66 سم
أهم مقاسات الفرخ السليم في مطبعة بيست بوست
– الفرخ كامل بيكون مقاسه 100×70 سم وفي مرحلة المونتاج باخد سنتي من الضلع الأصغر لحاجة اسمها سنتي البنسة، بيكون هدفه تقليل ان مرحلة القص تاكل من التصميم بتاعي يعني بيكون المقاس في المونتاج 100×69 سم.
– النص فرخ بيكون مقاسه 50×70 سم ونفس الوضع بشيل في مرحلة المونتاج سنتي البنسة.
– الربع فرخ مقاسه 50×35 سم
– مقاس الثمانية 25×35 سم
– مقاس 16 بيكون مقاسه 25× 17.5 سم
– مقاس التلت بيكون مقاسه 33×70 سم
– مقاس 11 بيكون مقاسه 20×30 سم
– مقاس 5 بيكون مقاسه 25×40 سم
– مقاس 9 بيكون مقاسه 23×33 سم
– مقاس 25 بيكون مقاسه 14×20 سم
أهم مقاسات الفرخ الجاير في مطبعة بيست بوست
– الفرخ الجاير الكبير بيكون مقاسه 88×66 سم وزي ما قولنا فهو مقاساته مختلفة تماماً عن مقاسات الفرخ السليم، وفي مرحلة المونتاج باخد سنتي من الضلع الأصغر لحاجة اسمها سنتي البنسة، بيكون هدفه تقليل ان مرحلة القص تاكل من التصميم بتاعي يعني المقاس بيكون 88×65 سم، والجدير بالذكر ان الفرخ الجاير ما بيطلعش مقاس 5 الموجود في الفرخ السليم واللي بيكون مقاسه 25×40 سم.
– النص فرخ بيكون مقاسه 44×66
– الربع فرخ بيكون مقاسه 44×33
– مقاس الثمانية مقاسه بيكون 22×33 .. والمقاس ده قريب جداً من مقاس التسعة الموجود في الفرخ السليم.
– مقاس 16 بيكون مقاسه 22×16.5 سم.
بيحصل ايه للورق الباقي من مرحلة القص في مطبعة بيست بوست؟
بالنسبة للهادر الباقي من مرحلة القص اسمها (هادر) أو (هالك)، والمساحات الباقية دي نقدر نستخدمها في مطبوعات تانية بمقاسات اصغر، وفي الحالة بنسمي الزيادات من الورق (ستريشه)، ويفضل دايماً ما يبقاش فيه ستريشات، علشان كده بننصح بإستخدام المقاسات الإستاندر اللي مش هتسببلك خسارة في الورق وتكلفته.
وبكده نكون سردنا الفرخ السليم والفرخ الجاير وبيّنا ولو جزء بسيط من أهمية كل نوع فيهم في مجال طباعة الورقيات، ووضحنا مقاساته والفرق بينهم، وبجد بنشكرك لـ إنك وصلت لهنا، استنانا في مقالات مختلفة، وتقدر برضو تتصفّح مدونتنا هتلاقي فيها معلومات مهمة أوعدك انها هتفيدك، ولو عايز تكون أول مين يعرف بإن فيه مقالة نزلت تقدر تشترك في خدمتنا البريدية وهنوافيك بكل جديد يخص عالم الطباعة.
