ايه هي أنواع الورق اللي بيتم الطباعة عليه؟

الانتاج المحلي من ورق الطباعة قليل جداً، ومش بيغطي احتياجنا للورق بمختلف أوزانه وأحجامه ومقاساته، فبنضطر نستورد الورق من دول زي الصين، اندونيسيا، الهند ودول أوروبا ..

وقبل ما نتكلم عن أنواع ورق الطباعة عايزين ناخد كام معلومة عامة عن أنواع الورق الموجود عندنا في مطبعة بيست بوست ، وازاي اختار نوع مناسب وجودته عالية ..

أول حاجة؛ للورق 3 أوزان رئيسية، هُما 75 جم، 90 جم، 150 جم، وبنلاقي ان وزن 75 جم شائع أكتر مع طباعة المستندات والنصوص، ووزن 90 جم بنستخدمه في طباعة الصور العاديّة وطباعة الوشين بتوع الورقة، أما وزن 150 جم بنستخدمه في حالة تدرج الألوان في الشيء المراد طباعته زي الرموز والرسومات والصور اللي بيكون فيها ألوان كتير..

تاني حاجة؛ فيه مقياس لسُمك أو شفافية الورقة، والمقياس ده بيبتدي من صفر وبيوصل لـ 100 ، والمقياس ده بيساعدك تعرف مدى شفافية الورقة، اللي بالطبع كل ما بيزيد رقم مستواها على مقياس الشفافية كل ما كِبر سمكها وما بقيتش شفافة.

تالت حاجة؛ هي ان مش كل الورق ينفع يتطبع في طابعة واحده، وده لأن فيه نوعين من أوراق الطباعة، وهُمّا الورق الناعم والورق الخشن، أوراق الطباعة الناعمة بيتم الطباعة عليها عن طريق طابعات الليزر. أما أوراق الطباعة الخشنة فبيتم استخدامها في الطابعات العادية اللي نوع الحبر فيها بيكون حبر مائي، وده لأن أوراق الطباعة الخشنة بتقدر تمتص الحبر أكتر وده بيخليها ملائمة للنوع ده من الطابعات.

ودلوقتي هنتعرف سوا على أهم خامات الورق اللي بيتم الطباعة عليها زي:

ورق الطباعة و ورق التصوير :

زي ورق البرينتر، الكراسات، الكتب، الأجندات، أوراق الشركات الرسمية، الليتر هيد، البلوك نوت، نشرات الأدوية والاعلانات اللي بتتوزع في الطرق، وجرامات النوع ده من ورق الطبع كتيرة:

(56 جم، 60 جم، 70 جم، 80 جم، 100 جم، 120 جم) وبنلاحظ ان مقاس كل الورق واحد وهو 84.5×60 سم

ما عدا الـ 100 جرام اللي بيكون مقاسه 86×61 سم.

وعلشان تعرف أكتر عن ورق الطبع ممكن تزور مقالتنا وتعرف أكتر عنه..

ورق الكوشية في مطبعة بيست بوست :

من أشهر الورق اللي بنستخدمه في الدعاية والاعلان، وبنطبع عليه البورشور، الفلايرز، الكتالوجات، الكروت الشخصية، الدعوات، المجلات، المنيوهات وأغلفة الكتب، يوجد منه النوع المط واللامع، وجرامات ورق الكوشية متنوعة:

(90 جم، 115 جم، 135 جم، 150 جم، 180 جم، 200 جم، 250 جم، 300 جم، 350 جم)

الفرخ السليم من ورق الكوشية مقاسة 100×70 سم، والفرخ الجاير من ورق الكوشية مقاسه 88×66 سم .. وعلشان تعرف أكتر عن الفرق بين الفرخ السليم والفرخ الجاير زور مقالتنا عن الفرق بينهم وعلشان تعرف اكتر عن ورق الكووشية تقدر تزور مقالة ورق الكوشية.

ورق البريستول في مطبعة بيست بوست :

هو ورق مقوى، بنلاقي منه نوعين ناعم وخشن، وأما عن الوانه ففيه البريستول الأبيض والبريستول الملون، وبيتم استخدامه في الرسم الهندسي والفني، وبيتم الطباعة على وجه واحد بس، لأنه ماينفعش يتم الطباعة على الوجهين، لأنهم متشابهين، وبيتم استخدام الخامة دي في كروت المتابعة الخاصة بالدكاترة، والصيدليات .. وجراماته متنوعة:

(130 جم، 140 جم، 180 جم، 230 جم، 240 جم، 250 جم، 280 جم، 300 جم)

والملون متاح منه فقط 130 جم و230 جرام، وألوانه بتتنوع بين الأصفر .. الأخضر الفاتح .. الأحمر الفاتح .. اللبني، وبييجي بمقاس 100×70

تقدر تعرف أكتر عن ورق البريستول واهم المنتجات اللي بيتم استخدامه فيها، عن طريق مقالة خامة البريستول.

ورق بريستول مع كوشية في مطبعة بيست بوست :

هو ورق مدمج من خامتين، خامة البريستول وخامة الكوشية، ليه وجه ناعم وضهر أبيض أو كريمي خشن شوية، وغالباً بيتم الطباعة على الوجهين في حالة الكروت الشخصية..

واستخداماته غالباً بتكون في علب الأدوية والمستحضرات الطبية والمستحضرات التجميلية، لأنه بيمتاز بالقوة والمرونة عن الكوشية، خاصة في أماكن الريجا، وأماكن الريجا دي معناها أماكن التنيات، اللي بيتني فيها الورق علشان يبقى علبة كشكل نهائي، والخامة دي بتسند جداً في حالة التني، لأنها على عكس خامة الكوشية بيكون صعب انها تتعرض للريجا علشان تنيها بيخليها تتكسر، فعلشان يتم تجنب المشكلة دي بتتعرض لحاجة اسمها “سلفنة”، والسلفنة دي عبارة عن وضع طبقة سلوفان على خامة الورق الكوشية علشان تبقى كطبقة حماية وتديني مرونة وانسيابيه وانا بتني العلبة.

أما ورق البريستول كوشية فـ ميزته في مرونته وقدرته على التحمل، مع ميزة أكبر في حالة تصنيع العلب وهي انه بيكون أقوى في أماكن اللزق فبتكون علبته أقوى وتحس العلبة ماسكة نفسها ومحتفظة برونقها.

وبييجي بمقاس 100×70 سم أو 88×66 سم .. وسعره بيكون أغلى من الكوشية، لكن بيني وبينك يستحق كل جنية تحطه فيه، لأنك هتاخد متانة وسرعة في اللصق وتاخد علبة ماسكة نفسها أحسن من انك تاخد خامة تانية وعميلك يتضايق من علبة المنتج وياخد انطباع سلبي عنها، وعلشان تعرف أكتر عن أهمية ورق البريستول كوشية في أدوات تغليف منتجاتك ما تفوتش مقالة أهمية ورق البريستول الكوشية لتغليف منتجك

وجرامات البريستول كوشية بتكون 180 جم، 210 جم، 230 جم، 250 جم، 270 جم، 300 جم، 350 جم ..

ورق الكرومو 80/90 في مطبعة بيست بوست

واسمها كرومو تمانين تسعين، علشان متوفر بوزنين؛ وزن 80 جم، ووزن 90 جم، وبيتميز بإن ليه وجه لامع بيتم الطباعة عليه، ووجه خشن علشان يتلزق منه على زجاجات الزيت والخل أو العلب البلاستيكية عموماً..

ورق الدوبلكس في مطبعة بيست بوست

ورق الدوبليكس عبارة عن وجهين، وجه أبيض بيتطبع عليه، وجه رمادي خشن، وبيتصنع منه أغلفة الكشاكيل وعلب الحلويات، علب المناديل، تقفيل الدفاتر المكربنة، وجراماته 140 جم، 150 جم، 180 جم، 200 جم، 220 جم، 250 جم، 300 جم، 350 جم، 400 جم، 450 جم.

وبنلاق ان الخامة دي موجود منها خامة تصنيع محلي، مقاسات الفرخ 100×70 أو بييجي على هيئة بكر.

الورق المكربن في مطبعة بيست بوست

الورق المكربن استخدامه الشائع في الدفاتر المكربنة زي الفواتير والإيصالات، وبيتكون من ألوان (أزرق – أحمر – أصفر – أخضر) .. جراماته 55 جم، 60 جم، ومقاساته هي 100×70 فرخ سليم، ومقاس 84.5×60 فرخ جاير، ووضحنا الفرق بين الفرخ السليم والجاير هنا.

ورق البرشمان في مطبعة بيست بوست

بيتعمل من ورق البرشمان الدفاتر، ودفاتر البرشمان بتختلف عن الدفاتر المكربنة، في انك بتحتاج لكربون علشان تنسخ المكتوب في الأصل وتعمل منه صورة، وجراماته بتكون 45 جم، 55 جم، 75 جم، والفرخ السليم منه مقاسه 100×70 سم، والفرخ الجاير منه 84.5×60 سم.

ورق الكرافت في مطبعة بيست بوست

هو نوع ورق لونه غامق شوية بيتعمل منه شنط المطاعم والتيك أواي وشنط الهدايا، ومصانع الأحذية بتستخدم ورق الكرافت في تغليف الأحذية عند شحنها، وأدوات التغليف عموماً، حيث يتم الطباعة عليها، على سبيل المثال طباعة الشعار الخاص بمطعم ثم يتم تغليف الساندويتش بورق الكرافت المطبوع ..

ورق الكرافت بيتوفر منه كرافت طبيعي وده بيكون متماسك وصعب انه يتقطّع مع الاستخدام، بخلاف ورق الكرافت الطبيعي المعاد تدويره اللي نسبة تقطيعه تزيد لأنه فقد شوية من تماسكه مع الاستخدام المستمر، وبتيجي أوزانه من (30جم لـ 70 جم)

ما تفوتش مقالة أهمية التغليف لنشاطك التجاري والخدمي

ورق الكريستال في مطبعة بيست بوست

بيتصنف ورق الكريستال على انه من خامات الورق اللي تكلفتها عالية، لكن فعلاً هو يستحق كل جنية بيتدفع فيه، لأنك بتقدر تحصل من خلاله على منتج شكله حلو، أنيق وشكله شيك، مش بس مظهره الخارجي، كمان بيتميز الكريستال بإنه سميك ومتين، وعلى رغم متانته وسُمكه إلا انه طري ومرن في نفس الوقت وصعب انه يتقطع، وبنلاقي انه خامة ممتازة جداً لصناعة كارت شخصي شيك وشكله جذاب، وبيتم استخدامه كمان في ورق المكاتبات الدعائية.

ما تنساش تزور مقالة أفضل خامات صناعة الكارت الشخصي علشان تعرف ازاي تحصل على كارت شخصي مميز وشيك بهويتك البصرية والشخصية كمان، بحيث تمتلك كارت يعبّر عنك وعن شركتك.

ورق الفبريانو في مطبعة بيست بوست

ورق الفبريانو برضو بيتصنف انه ورق غالي، وانه مرشح مثالي لطباعة الكروت الشخصية، نظراً لـ إنه ورق سميك، متين، وجراماته كبيره، يعني لو بتدوّر على كارت خامته تعيش معاك فأظن ان خامة الفابريانو خامة مثالية جداً، وخيار أفضل ليك.

ورق القماش في مطبعة بيست بوست

ورق القماش ورق مضلّع من جمب، والجمب التاني عادي، ومش مصنوع من القماش، هو بس اسمه قماش لأن خامته شبيهه بالقماش، لونه بيكون أبيض وفيه نوع تاني لونه بيكون بني، مشهور عنه انه بيتطبع عليه الشهادات، وكمان خامة ممتازة لطباعة الكروت الشخصية.

الاستيكر في مطبعة بيست بوست

الاستيكر معروف انه بيكون فيه وش بيتطبع عليه ووش تاني بيتحط عليه المادة اللي بتخليه يلزق على أي شيء تاني، وبينقسم لنوعين:

– الاستيكر الورق، اللي بنشوفه في بوسترات الناخبين، وزجاجات البرفيوم مثلاً، واستيكرات علب الدوا اللي بيتوفر منه النوعين (الأسباني صاحب الضهر الابيض، والصيني اللي ضهره أصفر)

– الاستيكر الشفاف اللي بنشوفه على العلب والمنتجات المعرضه للمياة.

ورق الكونكورد في مطبعة بيست بوست

ورق الكونكورد واحد من الخامات اللي بتكون تكلفتها عالية وبتتميز بالفخامة، وبيزيد في فخامته عن خامة ورق الكريستال، وممكن يكون بديل مثالي للكريستال في طباعة الكروت الشخصية والخطابات.

ورق الكلك في مطبعة بيست بوست

ورق الكلك هو ورق شفاف شبه ورق الزبدة، بس ورق الكلك بيكون سميك أكتر، وبيستخدمه طلبة الجامعة علشان يطبعوا عليه التصميمات الخاصة بيهم، وبيستخدمه طلبة الجغرافيا في رسم وشف الخرائط، وبييجي بأوزان مختلفة أبرزها 90 جم و 100 جم ..

ورق الأوبالين في مطبعة بيست بوست

ورق الاوبالين بيعتبر زي ورق الكونكورد في كونه غالي التكلفة، بيتميز بملمسه الناعم جدا، وورقه بيكون ناصع البياض جدا، وانسيابي للغاية، وقريب جدا من الورق الكوشية، وبيتم استخدامه في طباعة الكروت الشخصية، لفخامة شكله.

وبكده نكون سردنا كل أنواع ورق الطباعة وبيّنا ولو جزء بسيط من أهمية كل نوع فيهم في مجال طباعة الورقيات، ووضحنا أنواعه وجراماته ومقاساته، وبيتم استخدامه في ايه، وبجد بنشكرك لـ إنك وصلت لهنا، استنانا في مقالات مختلفة، وتقدر برضو تتصفّح مدونتنا هتلاقي فيها معلومات مهمة أوعدك انها هتفيدك، ولو عايز تكون أول مين يعرف بإن فيه مقالة نزلت تقدر تشترك في خدمتنا البريدية وهنوافيك بكل جديد يخص عالم الطباعة.

511510cookie-checkورق الطباعة .. ايه هي انواعه؟no